不經不覺，少爺占跟Donald組成的I LOVE YOU BOYZ已在娛樂圈打滾了七年，無論在大氣電波、電視、電影、舞台劇，甚至廣告，一直都孖住上發放笑彈，但二人突然宣布，今年12月舉行的一連四場《普世 歡騰核能人》舞台劇是他們以艾粒名義出現的最後一次演出。09年有太多久未露面的舊名字蒲頭，這對帶給我們不少歡樂的活寶貝卻宣布要退下火線，不捨，但我 相信不久的將來，他們一定會再拍住上，不要讓我們等太久，OK?
六成無聊嘢
阿占說，12月的舞台劇之所以名為《普世歡騰核能 人》，是有見這七年的I LOVE YOU BOYZ生涯裡，大家都認定他的角色是核能人（即衰人），Donald則總是以好人姿態出現，不是覺得不公平，而是覺得這個現象很有趣。Donald說： 「開頭度呢個騷係想講友誼，但就咁講又好老土，我同阿占嘅關係有上下把位，我係好人，佢成日恰我，但其實我哋每個人同朋友都一樣有上下把位，我喺朋友圈都 可能係恰人嗰個，永遠都係一凹一凸，都幾好笑。」以往艾粒的舞台劇，多數都係無厘頭、笑餐飽的gag show，今年會否因為是最後一年，來個感性的ending？占說：「今次個騷有啲似fans大匯集，係艾粒嘅集體回憶，所有嘢都係ride on我哋呢七年發生嘅事，但就以gag為主，無乜特別訊息。以前度橋都會想有啲訊息，後來度完就覺得唔使，都係開心無聊笑為主。」Donald說：「你喺 街問十個人，艾粒開騷你想我哋扮女人，定係正經做一個有內容嘅talk show，我諗十個都會答你係扮女人，今次應該會係一半一半，大約六成係無聊嘢。」
經典現舞台
少爺占與Donald這對拍檔 合作多年，自然有很多難忘moment值得大家回味，這些場口都將會一一呈現在舞台上，如電台節目的經典角色，黃鳳女士、銀河道士，全部都會出現同大家見 面。「以前一啲廣播劇橋段會放上舞台，例如有個角色叫攣豬豬，係我哋扮office入面嘅攣人，Donald會扮銀河道士，仲有古裝劇《大連的子民》，攣 角色同古裝都係以前未做過嘅，今次會活化現身舞台。至於黃鳳女士當然會有，但就未諗到點樣出場。」艾粒拆夥，但有太多經歷、太多畫面二人都不會忘記，例如 二人少有的感性的一面。「最記得係第一次見到少爺占喊！做第一個賣飛騷《龍兄鳳弟》真係好辛苦，壓力好大，第一場做完謝幕時我見到佢喊，係第一次，仲要喊 到缺堤咁，搞到我都眼濕濕。」阿占反而不是太記得這個畫面，他說：「有咩，有喊咩？我最記得反而係去鹿兒島幫TVB拍嘢嘅trip，難忘係走嗰日有得俾我 哋搭早一班機，去東京轉機，我哋計過如果出市區得40分鐘行，都照去，仲記得搭JR到原宿我哋係跑口架，去到裡原宿我哋求其掃咗啲嘢就要走人，趕到呢，但 真係好開心。」
阿占與Donald於訪問當日各帶來了最珍貴5件物品，全部都有段故，記載住艾粒的成長。
01. 《艾粒老爺車》嘅相係我哋童年照，但字就係我哋去鹿兒島幫TVB拍嘢時寫，嗰時我哋仲係TVB嘅寵兒。永遠記得嗰段日子，好開心，本書寫咗好多嘢，同埋無乜錯字口架。
02. 出道以來第一樣隨碟附送嘅產品，嗰時係喺七間唱片舖，買碟會俾個金幣你，扭扭蛋至有。
03. 英皇時期推出嘅第一張碟，記得第一次喺公司見到真係好感動。個packing好靚，仲記得唱片封套嘅衫係何嘉莉幫我哋襯。
04.《萬世巨星》係嗰時寫咗個聖誕special廣播劇，搵嚟好多當時得令嘅歌手聲演，陳曉東、李彩樺、Cookies、鄭中基、Twins等等，係咪難得先。
05.&10. 第一個賣飛舞台劇《龍兄鳳弟》嘅場刊，嗰時啱啱開咗場唔係賣飛嘅show，反應好好，當時唱片公司就話不如投資開一個賣飛show，都戰戰兢兢，未知賣飛能力去到邊，好彩反應都非常好。
06. 我哋第一次做舞台劇《龍兄鳳弟》出嘅tee，點解無阿占嗰件？因為佢嗰款太好賣，剩番我自己呢件，就拎去裱起佢。
07. 呢本係一班熱血fans印嚟送俾我哋嘅《與艾粒一起經歷的零七零八》特集，製作好認真，我諗佢哋總共印咗20本左右啦，09年頭收到，真係好感動。
08. 《東京勁作狀》，係我哋有一年DVD賣得好好，於是第二年就加碼去日本。不過好辛苦，七日裡面5點起身凌晨2點收工，超密集，着封面套衫都辛苦，臭到喊，生化武器咁，因為三十幾度天氣着住件膠衫，你諗吓喇。
09. 第一次嘅《東TOUCH》封面，係拍電影《六樓後座》宣傳期時影嘅，由Wing Sha操刀，影得好靚。
11. 呢本係98年嘅《Amoeba》，係11年前我哋剛出道做DJ，一齊做第一個節目時嘅訪問，嗰時我嘅口頭蟬係「唔係囯？」阿占嘅口頭蟬就係「般若波羅蜜」。a
