袁詠儀：影嗰個要打屁股
2009-09-15
袁詠儀
黃伊汶
【東方日報專訊】正當眾星一心一意為慈善，竟發生更衣室偷拍事件，議論紛紛之餘亦搞到人人自危。
袁詠儀
「喺慈善賽搞啲咁嘅嘢，影嗰個人真係要打屁股！不過我都冇聽阿城講過，唔緊要啦，佢一身好肌肉唔怕畀人影。我都有喺女更衣室換過衫，但我背住個窗換，又有助手幫我＇住個窗，應該冇事嘅。」
黃伊汶
「我當日有着運動衫同三個骨褲打底，之後先再着賽車手套衫，唔會蝕底。啲人咁做係係犯法嘅，大家都要小心啲，去安全嘅地方先好換，或者好似我咁打埋底先，就完全唔使驚啦！」
陳小春助手
「小春依家喺北京做緊舞台劇，但係相信件事對佢冇影響，因為小春從來都喺酒店換好衫先去車場，唔會喺車場度換衫。」
吳家樂
「其實係有個車手發現嘅，當時更衣室入面有城城同埋兩位車手，其中一個車手入去時見到有相機即刻追出去，但嗰個人已經走咗，都唔知係fans定係狗仔隊。其實我哋同Aaron換衫時已經用單車褲打晒底，最多都係上身冇着衫。」
李珊珊
「發生呢件事之後好驚，我唔敢再喺車場度換衫，就算着住套賽車衫幾熱都好，幾十度都唔喺現場換，我一定喺酒店着住套賽車衫去車場，再由車場返去酒店先換，個身濕晒都唔會除。」
