[娛樂新聞] Paul繼續學棒棒堂咪嘴(視頻)

黃貫中一向有火，即使會辣㷫棒棒堂嘅歌迷，都要暗寸棒棒堂愛咪嘴。

無懼狂迷炸爆 Blog
馮仁昭四圍超： Paul繼續學棒棒堂咪嘴

啲 band友一向好火，何況係玩 band玩到出神入化嘅黃貫中（阿 Paul）！阿 Paul一向不平則鳴，見到樂壇唔好嘅現象例必開聲批評，唔會話畀面而手下留情，好似早排台灣人氣偶像組合棒棒堂喺香港舉行兩場演唱會時被發現咪嘴，阿 Paul早排接受訪問都明寸話要向呢六子學習點咪嘴。點知阿 Paul嘅言論引起棒迷不滿，棒迷仲群起炸爆阿 Paul嘅網誌，勁鬧阿 Paul胡亂批評。

黃貫中同家強（左）下星期開騷，噚日綵排大騷到時售賣嘅紀念品。

棒棒堂早前喺紅館舉行兩場演唱會，獻唱時更被發現有咪嘴之嫌。

「隨便炸」

所謂老馬有火，阿 Paul前晚同黃家強到土瓜灣綵排下星期舉行嘅「 This is Rock& Roll」演唱會，對於棒迷炸 blog，阿 Paul完全唔當一回事，仲繼續咬住唔放話：「隨便炸，如果鍾意偶像就梗係想佢哋進步，如果覺得冇問題，玩嗰個開心，睇嗰個又開心，我冇嘢，唔使咁激動， 我依然係想向佢哋學習咪嘴啫。」
阿 Paul同黃家強仲公開埋演唱會期間售賣嘅紀念品，當中有牛仔褲、 T恤同褲，佢哋話唔係想賺錢，只係想做個紀念啫。
此外，棒棒堂同范瑋琪主持嘅台灣節目《模范棒棒堂》前晚最後一次錄影，呢個月 30日會播出最尾一集。