[娛樂新聞] Freeze狂插Lavina人窮冇骨氣(視頻)

馮仁昭四圍超
遭 Freeze狂插人窮冇骨氣　 Lavina：唔使可憐我

Lavina以《義勇群英：毒蛇危機》中男爵夫人嘅造型示人，仲大擺有型甫士。

擁有 34E巨咪嘅 o靚模鍾蕙芝（ Lavina）前晚到九展出席新片《義勇群英：毒蛇風暴》（ G.I. Joe： The Rise of Cobra）首映禮，大騷巨咪，搶盡同場女星風頭，連導演葉念琛一見佢埋身都匆匆彈開，搞到 Lavina好尷尬。
Freeze 嘅石詠莉（ Suki）同陳樂榣前晚借朋友、衣架大王之子劉德俊（ William）之名，踩多 Lavina兩腳。其實 Freeze出道時咪又係靠性感賣肉兼出位言論而上位。早前 William被拍得與 Lavina約會，所以 Suki一到場即滔滔不絕咁話：「 William好唔開心畀女玩，個女仔大家都知係邊個，覺得佢好卑鄙同乞人憎，為咗見報出賣朋友，討厭呢個女人，應該收斂吓。初初新聞見佢都覺得佢好慘，因為佢家貧。其實男歡女愛都好平常，今次係女方做主動，就算唔係有錢人都要有骨氣，攞父母嚟講就過火咗，總之唔會同佢合作，搶人男友亦都唔好。」

場地老闆胡文新對性感撐場嘅 Lavina好受落，兩人有傾有講。

Freeze前晚三缺一出席首映禮，石詠莉（左）同陳樂榣齊心聲討 Lavina。

胡文新嗒糖

憑 34E驕人身材而成功上位嘅 Lavina談吐大方得體。

至於被數落嘅 Lavina面對傳媒時就大方應對，贏盡風度，難怪連場地老闆胡文新都同佢傾到雞啄唔斷。對於 Freeze嘅言論， Lavina就話：「我唔覺得自己可憐，自己都唔想騷擾到家人。其實香港有好多單親家庭，六成人都係住公屋，大家唔使可憐我，每個人出身背景都有一個古仔，自己都有少少唔開心。但誤會總會發生，希望佢留意我多啲，了解咗先再評論，我行得正企得正，對得住自己、對得住天同地，對得住自己咪得。」佢重申同 William只認識一星期，知男方有女朋友後佢都冇接觸嘞。