子華懷舊講淫照 俞琤悶到瞓着
黃子華前晚舉行首場棟篤笑，不少圈中好友現身捧場，雖然黃子華的 talk騷受到林海峰的棟篤笑和詹瑞文的舞台劇分頭夾擊，但首場仍座無虛席，黃子華的話題由最近的賭王何鴻燊入院以至年前的淫照事件也有提及，但商台老頂俞琤半途竟釣魚呼呼入睡，認真唔畀面。
黃子華邀請女觀眾上台一同互動，兩人扭作一團齊齊笑到四萬咁口。
棟篤笑始祖之一黃子華前晚在灣仔伊館舉行首場《嘩眾取寵》棟篤笑，一班好友如吳鎮宇、劉青雲和郭靄明、朱茵和黃貫中、陳法蓉、林家棟、 2R及向佐等齊齊捧場。之前曾有傳子華因被林海峰的棟篤笑及詹瑞文的舞台劇分頭夾擊而受很大壓力，不過當晚仍全場爆滿，難怪他盡力演出並以這個話題作開場白邊 rap邊自嘲說：「阿林海峰夾死我，詹瑞文又插死我，真係好大壓力。」
劉青雲和老婆郭靄明拍拖現身撐老友場，認真畀面。
Rosanne年尾將結婚，當晚她不介意做電燈膽和妹妹及向佐一同睇騷。
商台老頂俞琤（箭嘴示）竟在節目中途公然釣魚睡覺，不知黃子華若看在眼裏會有何反應？
金融海嘯贏賭王
當晚題材應有盡有，好像近日入院的賭王何鴻燊也被子華辣中，他說：「早排金融風暴，每個人起碼唔見一半身家，福布斯話李嘉誠唔見一半身家，何鴻燊就唔見九成。我同誠哥打成平手，贏咗何生，我從來未贏過何生，可以喺澳門買兩盒蛋卷都當贏。佢入院唔關我事，希望佢早日康復。」
接着子華又以陳冠希淫照事件作笑料：「婚前性行為會令人身敗名裂，但婚外情就可以令人致富。畀人偷睇要道歉，但偷睇嘅人就可以投訴。有好多人相信有過性行為就唔可以天真，咁有冇人嘅媽咪係冇過性行為？」台下有男觀眾大叫：「瑪利亞。」子華聞言即說：「你想自己係耶穌，好大膽，咁我燒啲嘢畀你，燒腸仔同豬扒畀你。」之後他續說：「拍拖想更進一步係必然，但家係問幾時可以拍低佢，拍低佢更加重要，你愛我就拍低佢。」
Race未願嫁向佐
子華在台上落力演出，商台老頂俞琤卻公然在座位上呼呼入睡，擺明嫌悶唔畀面，看至一半更中途離場。另外，許冠文大部份時間都木口木面，毫無反應。
此外，開場前問到準新娘黃婉君（ Rosanne）婚禮準備？她表示大部份仍在構思中未有落實，但初步定了由妹妹黃婉佩（ Race）任伴娘，婚紗則由好友設計，問到 Race會否考慮和向佐結婚？她說：「冇咁快，家要努力搵錢。」而向佐則任勞任怨為女友買飲品解渴。
採訪：魯萍
攝影：彭琮然
