舒淇半天吊未跳呱呱叫
2009-07-29
畏高的舒淇要大嗌壯膽，才敢從高處躍下。
舒淇棄用替身，與鄒兆龍站在兩層樓高的貨櫃頂拍攝。
【東方日報專訊】影后舒淇向難度挑戰！畏高的她於兩層樓高貨櫃上與對手糾纏，又要從高躍下兼被凌空吊於貨櫃尾，拍攝前嚇得舒淇呱呱叫兼頻頻拍心口壯膽，不過最後仍被威吔勒傷及撞瘀，結果要忍痛提早收工。
舒 淇、郭富城、鄒兆龍前晚於將軍澳為新片《全城戒備》拍攝重頭戲，劇組出動大型吊臂、貨櫃車及數十輛私家車來配合。舒淇與化上特技裝的鄒兆龍於約兩層樓高的 貨櫃上糾纏，向來畏高的舒淇雖然已繫有威吔，但當踏上貨櫃頂即嚇得呱呱叫，並謂：「好驚呀！咁高嘅！」及後導演陳木勝要求兩人從高處躍下，舒淇頻頻拍心口 及大叫壯膽，更邊跳邊叫，幸好只需幾take便完成。
堅持親身上陣
不過舒淇還未能鬆一口氣，因接着便要拍攝一場被凌空吊於貨櫃尾戲份。弱質纖纖的舒淇，僅以雙手支撐身體，雙腳凌空吊吊fing，而貨櫃下有數十架汽車於四周穿插，場面危險非常。不過舒淇棄用替身，即使試位也堅持親身上陣，相當專業，期間還伸脷扮鬼臉緩和緊張氣氛。
正式拍攝時，舒淇被威吔緊緊勒住，雙腳又被貨櫃車鐵塊不斷撞擊，不過她仍死撐完成戲份。下車後她一拐一拐走路，又邊行邊摸左邊膊頭，狀甚辛苦。工作人員見狀即上前為她按摩，而導演得悉其傷勢後亦提早放人，讓她早些回家休息。
城城手臂勒傷
同 場的城城亦不遑多讓，拍攝被汽車撞的戲份時也親自上陣。對於舒淇受傷，城城謂：「拍呢部戲係幾辛苦，我都受傷呀！我左邊手臂都係畀威吔勒到，瘀晒都冇法。 就嚟台灣開騷，惟有呢兩日搽多啲去瘀膏。」陳木勝亦大讚舒淇專業，他謂：「佢都未試過咁高跳落嚟，仲有畏高添，事前佢唔知會係咁，但係都好接受，真係一個 好演員。」
文：影視組
